[
بكيت ليس لهزيمه مباراه ولكنى بكيت عندما قام الجزائريون
بحرق علمى وحمل نعش عليه علم مصر التى لم تبخل يوما
على أحد 00 رحم الله العروبة وإنا لله وإنا إليه راجعون 000000
رساله إلى ( جميله بوحريد ) !!!!!!!!
------------------------
فى مره اجتمعنا زمان فى بيت جدنا ( يَعْرُب )
سأل العيال اللى شاطر من بينكو 00 راح يِعْرِب
كتب 00 ( بالإتحاد المجد إن عشتم )
واللى فيكم حبيبى للمعنى راح يفهم
كل الولاد طنشوا م الوحده عاش يهرب
وانا الوحيد صنتها م الشرق للمغرب
***************
يا ( جميله ) وجه الوطن كان حِته من وِشِّك
والجنه كانت حمام بيحط فوق رمْشِك
والبدر كان م ( الجزاير ) والشمس من ( تُونِس )
سَمينا كل البنات من حُبِّنا ( عزيزه ) والوِلْد كان ( يُونُس )
عشنا تغنى الوطن ساقيه وعصفورها طاير على عشك
**************
( بوحريد ) ياوجه الجزاير والأخوه فى شمالنا
( جميله ) ليه علمت الكُرْه لعيالنا
بتوصى ليه العيال يحرقوا علمنا ويزغردوا لنَعْشِى
واحنا اللى بعنا عشان أرضكم فَرْشِى
وإن كان ده ( رد الجميل ) راح نجعله مالنا
*************
رفرف بعيد فى السما واضحك قصاد عينى
بكره اللى كان بحرقك فى الشده هيجينى
وإن كان فى لحظه اتهبل وِدَاسُوك بِجَزْمِتْهُم
أو شالوا جثه وطن فى نعوش زبالتهم
شكرا على كرههم واعلم فى يوم ذلهم راح يعوزونى
***************
معدش بينا كلام من بعد شيل نعشى
وصلت لحد التمنى وأنا سليم بمشى
إن كان فرحتم بموتى وانا اللى بَدَّيْتَكم
وقت المرض صحتى والقلب كان بيتكم
والوقتى داير تشيع جثتى الحيه 0 يابنى مينفعشى
*************
الغلطه موش غلطتك 00 الغلطه قلب أمى
من كتر ذكر المحبه 00 حبيت ولاد عمى
من كتر مااسم العروبه اتردد هنا فى بتنا
فكرت إن الجزائر فى الدنيا جَنَّتْنَا
لكن صحيت والنعش شايلينه وبيشربوا دمى
*****************
موش كُنا باسم العروبه كنا زمان واحد
بنغنى شوق للحبيبه وهَوَانَا كان واحد
الوقتى مين ضَلِّلَكْ تحرق فى رايتنا
عمال تنادى العيال يهدموا بيتنا
واعرف بإن اللى بِنْكِر جميل الأخ صار جَاحد
****************
فمتزعليش يابلد إن مره قولنا 00 لا
هو اللى قال وابتدى مرعاش حقوق الله
لا كبير فى يوم فهمه إن العلم دِينا
والنعش لو يحمله حتى غريب عنا
يبقى السلام انتهى حتى النشيد ننساه
---------------------------------------
بقلم / ابراهيم العدل
الجمعة 27 نوفمبر 2009, 8:47 pm
