موضوع: الحيــاة حلــوة !! الإثنين 26 أكتوبر 2009, 11:38 am
سكر حلوة الدنيا سكر .. أغنية غنتها شادية بتعبر فيها عن التفاؤل وإننا لازم نواجه الحزن والهم بالضحكة من القلب وان الدنيا زى السكر وقبلها فريد الأطرش قال الحياة حلوة بس نفهمها .. طيب طالما كده ليه إحنا شايفين الحياة سواد في سواد وكآبة وتشاؤم وصدمات وأزمات وخيانة .. " وكتاب حياتي يا عين ما شوفت زيه كتاب.. الفرح فيه سطرين والباقي كله عذاب " .. حتى الناس وهي ماشية تحس إنها تايهة عينيها زايغة والحواجب مقلوبة لفوق زى أفلام زمان مع إننا كنا بنحب الفنانين اللي بيمثلوا أدوار الشر وكتير كانوا بيضحكونا لكن سبحان مغير الأحوال الواحد فينا بقى بيكره كل حاجة حواليه حتى نفسه .. مع إن مفيش حاجة تستاهل ..هتقولي المرتب مش بيكفي عيش حاف يا أخي احمد ربنا في غيرك مش لاقيه العيش ماله ؟ .. مش سامع ..فيه مسامير وبقى بيخلص في قطمتين !! يا عم بلاش تكبر وتهول الأمور بالشكل ده يعني هو كل يوم بنلاقي مسامير في الرغيف يعني .. لا وفيه طوب كمان.. تصدق انك خايب بجد ومش فاهم حاجة .. سعر الطوب دلوقتي بقى في العالي يا سعده يا هناه اللي يلاقي طوبة ولا اتنين .. احتفظ بيهم تذكار يا تفضل تجمع في عيش لغاية ما تقفل الألبوم .. قصدي البلكونة وتعملها أودة للواد الكبير اللي في الثانوية ويبقى كده ضربت عصفورين بحجر واحد أكلت ومليت بطنك ووفرت تمن الطوب .. بالذمة دي حاجة تفرح ولاّ تزعل !! إيه تاني بتشتغل كتير ومش واخد حقك في الترقيات والعلاوات وغيرك ولا بيتعب نفسه وواخد كل حاجة لنفسه علشان ليه قرايب واصلين ..ده بقى قصر ديل علشان انت مقطوع من شجرة وكل قرايبك ناس غلابة ..يا أخي احمد ربنا وبوس ايدك وش وضهر يعني لما تلاقي واسطتك عافقينه من قفاه بتهمة رشوة ولا استغلال نفوذ ولا تربح ولا أي بلوة من البلاوي الجديدة اللي بنسمع عنها ويسيبك لوحدك ملطشة في ايد الكل .. ومش بعيد تتاخد في الرجلين ويصادروا كل ممتلكاتك في بنوك سويسرا وساعتها ولا هتلاقي العيش الكايزر الحاف ولا الباتون ساليه ومش بعيد تترفد من شغلك ده غير السمعة الهباب اللي هتلاحقك منين ما تروح .. وعلى رأي توفيق الدقن " أحلى من الشرف مفيش " ولو شوفت زميلك جاب عربية وساكن في فيلا من تفتيح المخ اعذره تلاقي عنده كوم لحم وبيحاول يسد طلباتهم اللي مش بتنتهي ماهو لو كل واحد بيحمد ربنا على اللي فيه هنشوف الحياة بشكل تاني خالص .. ولو حسيت مرة بس إنك زهقان ومش طايق روحك .. حاجة بسيطة جداً خد المدام واولادك الستة واطلع على كورنيش النيل وسيبك من فنادق الخمس نجوم والمراكب السياحية كله منظر على الفاضي ومش هترتاح هناك .. افرش ملاية كبيرة ومعاك ترمس شاي ولا مالوش لازمة هو كمان فيه كل100 متر واحد بيسترزق عامل بوفيه متنقل وعنده كل حاجة مشكلته بس ان المشروب اجباري والا هيغلس عليك بس ده أمره سهل أهو غلبان وبيلقط رزقه وبلاش تركز على المطوة اللي في جيبه دي علشان بيفتح بيها الحاجة الساقعة مش أكتر .. وبالليل بلاش تاخد معاك العربية الفخمة علشان العين مش أكتر واتمشوا كده اتفرجوا على المحلات ومش شرط تشتري .. خد فكرة على السريع على الأسعار والموديلات علشان بعد 10 سنين تبقى رايح على الحاجة اللي عجبتك على طول وبلاش تسمع كلام المدام وان مفيش أحسن من المستورد والماركات العالمية وتتعب نفسك وتسافر فرنسا عاصمة الموضة .. مفيش أحسن من المنتج المحلي أثبت وجوده بقوة وضد الزمن وعوامل التعرية .. والسعر حكاية حاجة ببلاش كده . وخلي بالك من عيالك كويس وامشي بين المظاهرات والاعتصامات .. أحسن رجلك تتزحلق وتقع في واحدة فيهم وتروح في الرجلين وتلاقي نفسك في يوم وليلة بيحاكموك بتهمة اتلاف ممتلكات الدولة والغير وانك بتطالب بالمساواة مع زملائك في الضرائب العامة مع انك موظف في الإصلاح الزراعي !! بتحلم بكوابيس نام خفيف يا أخي وبلاش تتقل في العشا وتتفرج على برامج القناة الأولى والتانية والمحليات اللي بتبهدل الضغط عندك.. خد لك لفة على الدش وعيش مع نفسك .. باليه بحيرة البجعة ولا اسمع السلام الوطني لحلف الناتو .. أو أقولك حاجة سيبك من التليفزيون خالص وخش على الإف أم .. وغمض عينك واسترخي خالص وتخيل نفسك عصير كوكتيل مضروب في الخلاط أو فراشة رقيقة هايمة في نسيج عنكبوت رومانسي واسمع صوت الموسيقى.. المقطوعة - نفّسها – العاشرة لبيتهوفن مثلاً .. أو مدد رجلك في الليفنج روووم ومع صوت قيثارة المغنى اللوزعية بأغنيتها " أركب الحنطور واتحنطر " وافضل اتحنطر من هنا للصبح لغاية ما يغمن عليك وتنام قرير العين ولا كوابيس ولا توريث ولا غيره .. شوفت الوصفة سهلة خالص علشان تعيش مبسوط وسعيد والدنيا تبقى حلوة في عينك ونسيبنا شوية من النكد اللي مالوش لازمة وعايشين فيه ليل ونهار وكل ما تفتكر حاجة وحشة ابتسم واضحك وغني " الحياة حلوة "..
موضوع: رد: الحيــاة حلــوة !! الجمعة 30 أكتوبر 2009, 8:54 pm
مروان كتب:
ما أروع كتاباتك ! ربنا يبارك فيك ..
أخى الحبيب و أستاذي الكبير :
فارس
الحياة حلوة فعلا .. و أجمل ما فيها القناعة بالرزق ..و السعى قدر الإمكان لتحصيل الرزق .. باين علينا وش تعب !!
تصدق .. عرفت فايدة الطوب الموجود في العيش الوقتى .. احنا ناس مفترية بجد.. مش نحمد ربنا على النعمة ..
...
أخى الحبيب لا تحرمنا هذا الزاد اليومى بالقراءة لك .. بارك الله فيك و جزاك الله خيرا ..
أهلاً بك أخي الحبيب مروان وتواجدك يزيد مقالي المتواضع رونقاً جميلاً
هناك الكثير لديهم قناعة بالموجود والمتوفر ولكن يبدو أن الحكومة لا تعجبها تلك القناعة وكأنها تختبر قدرتنا على الصبر والتحمل ..فعندما تجدنا قانعون بالأسعار تقوم بزيادة السلع الأساسية نسدد الضرائب ونحن صاغرون لا يكفيها بل تخترع المزيد والمزيد وآخرها الضريبة على العقارات احنا فعلاً ناس مفترية ولا بيعجبنا العجب ومش مقدرين النعمة اللي عايشين فيها .. نشوف الصومال وأثيوبيا وأفغانستان ..حرام نظلم الحكومة ولازم ندعي لها كل يوم خمس مرات بعد كل صلاة وعقبال ما نشوف عيال عيالهم يارب وهم ماسكين الحكم زي آبائهم وأجدادهم قولوا آمين
فارس كبير المراقبين
عدد المساهمات : 98 تاريخ التسجيل : 13/10/2009
موضوع: رد: الحيــاة حلــوة !! الجمعة 30 أكتوبر 2009, 8:56 pm
الإثنين 26 أكتوبر 2009, 11:38 am
