ومن مدونة "مفيش فايدة".. وتحت عنوان "مليون شهيد": نطالع هذه الأبيات الشعرية:
مليون شهيد وتاريخ مجيد من الكفاح المشترك
وخوض غمار المعترك في آخر الشوطة اخترق
مين علمك تقتل أخوك وأمك وأبوك
واحنا اللي قدمنا الدما قبل العرق
خلاص وصلنا المفترق.. وثورتك.. حريتك
دول كان مخاضهم أرضنا وفي حضننا..!!
تيجي أنت تهتك عرضنا!!
تحرق علمنا اللي كان شاهد علي قبر الشهيد..
بقي هو ده الجيل الجديد؟!
ده نسل بن بيلا وبومدين والرجال
اللي لما ضاق الكون عليهم شدوا الرحال
رفعوا علمهم فوق صدورنا
قبل ما يغوص في الرمال
غمض عيونك جوه قبرك يا جمال
متشوفش أحفاد النضال
واقفل ودانك أصل البيان
اللي جي من صوت العرب
بيقول علي المصري انضرب..!!
بيقول تاريخك كله كان وهم وخُطَب
نام يا بطل لا عليك ملامة أو عتب
وانزل يا واد.. من فوق كتاف القاهرة
أنت فقدت الذاكرة
لا تصلي في الأزهر ولا تمشي في حواري السيدة
ولا تسمع الكوكب وهي منشدة
ولا تقرأ محفوظ النجيب ولا حتي تسمع عندليب
خليك كده.. تحرم عليك كل العيون والأفئدة
تحرم عليك كل الدماء والأوردة
وبريئة منك ألف مدنة وكل جبهة ساجدة
وأنا حفضل المصري كريم العنصرين
اللي متربي وساكن في الحسين
اللي علمتك تقول الضاد وتنطق كلمتين
يابو اللسان الأعجمي
ہ ہ ہ ہ
انزل يا واد من فوق كتاف القاهرة
من إمتي بتشيل العيال.. دي مصر ولادة رجال
سادات. مبارك. ومعاهم الناصر جمال
واقفين علي شط القنال.. رافعين علمها اللي بإديك اتحرق
رجالة من عزة وشهامة مش ورق
يا حارق الطوق والشراع مين راح ينجيك مالغرق؟!
للشاعر المصري محمد السعيد
رداً علي فاقدي الذاكرة
الخميس 26 نوفمبر 2009, 6:25 am
